Khamosh ho kyo.n daad-e-jafaa kyuu.N nahii.n dete 
bismil ho to qaatil ko duaa kyuu.N nahii.n dete 

vahashat kaa sabab ruuzan-e-zindaa.N to nahii.n hai 
mahar-o-maah-o-anjum ko bujhaa kyuu.N nahii.n dete 

ik ye bhii to andaaz-e-ilaaj-e-Gam-e-jaa.N hai 
ai chaaraagaro dard ba.Dhaa kyuu.N nahii.n dete 

munsif ho agar tum to kab insaaf karoge 
mujarim hai agar ham to sazaa kyuu.N nahii.n dete 

rahazan ho to haazir hai mataa-e-dil-o-jaa.N bhii 
rahabar ho to manzil kaa pataa kyuu.N nahii.n dete 

kyaa biit ga_ii ab ke 'Faraz' ahal-e-chaman par 
yaaraan-e-qafas mujh ko sadaa kyuu.N nahii.n dete