vo nahii.n milataa mujhe is kaa gilaa apanii jagah 
us ke mere darmiyaa.N kaa faasalaa apanii jagah 

[gilaa=complaint; darmiyaa.N=between; faasalaa=distance] 

dil ki mausam ke nikharane ke liye bechain hai 
jam ga_ii hai un ke hoTho.n kii ghaTaa apanii jagah 

zindagii ke is safar me.n sainka.Do.n chehare mile 
dil-kashii un kii alag paikar teraa apanii jagah 

[paikar=form/body] 

tujh se mil kar aane vaale kal se nafarat mol lii 
ab kabhii tujh se na bichha.Duu.N ye duaa apanii jagah 

kar kabhii tuu mere dil kii Khvaahisho.n kaa ehataraam 
Khvaahisho.n kii bhii.D aur un kii sazaa apanii jagah 

ik musal_sal dau.D me.n hai manzile.n aur faasale 
paa.Nv to apanii jagah hai.n raastaa apanii jagah 

[musal_sal=continuous]