niyaaz-o-naaz ke jhaga.De miTaaye jaate hai.n
ham un me.n aur vo ham me.n samaaye jaate hai.n

ye naaz-e-husn to dekho ki dil ko ta.Dapaakar
nazar milaate nahii.n muskuraaye jaate hai.n

mere junuun-e-tamannaa kaa kuchh Khayaal nahii.n
lajaaye jaate hai.n daaman chhu.Daaye jaate hai.n

jo dil se uThate hai.n shole vo a.ng ban ban kar
tamaam ma.nzar-e-fitarat pe chhaye jaate hai.n

mai.n apanii aah ke sadaqe ki merii aah me.n bhii
terii nigaah ke a.ndaaz paaye jaate hai.n

ye apanii tark-e-muhabbat bhii kyaa muhabbat hai
ji.nhe.n bhulaate hai.n vo yaad aaye jaate hai.n