raato.n me.n gar na ashk bahaa_uu.N to kyaa karuu.N
ik pal bhii us ko bhuul na paa_uu.N to kyaa karuu.N

mai.n ne sunaa hai un ko andhere nahii.n pasand
raaho.n me.n ab mai.n dil na jalaa_uu.N to kyaa karuu.N

tumhii.n kaho ki chho.D de jab zindagii bhii saath
phir maut ko gale na lagaa_uu.N to kyaa karuu.N

sochaa to thaa ki chho.D duu.N us kii galii 'Murad'
lekin kahii.n qaraar na paa_uu.N to kyaa karuu.N