ab kyaa bataa_uu.N mai.n tere milane se kyaa milaa 
irfaan-e-Gam huaa mujhe dil kaa pataa milaa 

[irfan = knowledge/wisdom]

jab duur tak na ko_ii fakiir-aashnaa milaa 
teraa niyaaz-mand tere dar se jaa milaa 

[niyaaz-mand = humble/obedient]

manzil milii muraad milii mudda'a milaa 
sab kuchh mujhe milaa jo teraa naqsh-e-paa milaa 

[muraad = desire/wish; mudda'a = meaning/desire]

yaa zaKhm-e-dil ko chiir ke siine se phe.nk de 
yaa aitaraaf kar ki nishaan-e-vafaa milaa 

[aitaraaf = admit/agree]

"Seemab" ko shaguftaa na dekhaa tamaam umr 
kambaKht jab milaa hame.n kam-aashnaa milaa 

[shaguftaa (shiguftaa) = cheerful/happy; tamaam = entire]
[kam-baKht = unfortunate/unlucky person]