un se ummiid-e-ruunumaa_ii hai
kyaa nigaaho.n kii maut aa_ii hai

dil ne Gam se shikast khaa_ii hai
umr-e-raftaa terii duhaa_ii hai

dil kii barbaadiyo.n pe naazaa.N huu.N
fatah paakar shikast khaa_ii hai

mere maa_abad nahii.n hai dair-o-haram
ehatiyaatan jabii.n jhukaa_ii hai

vo havaa de rahe hai.n daaman kii
haaye kis vaqt niind aa_ii hai

khul gayaa un kii aarazuu me.n ye raaz
ziist apanii nahii.n paraa_ii hai

duur ho Gunche merii nazar se
tuu ne merii ha.Nsii churaa_ii hai

gul fasurdaa chaman udaas 'Shakeel' 
yuu.N bhii aksar bahaar aa_ii hai