zindagii kaa dard lekar inqalaab aayaa to kyaa
ek joshiidaa pe Gurbat me.n shabaab aayaa to kyaa

[joshiidaa=wave, Gurbat=senility, shabaab=youth, vigour]

ab to aa.Nkho.n par Gam-e-hastii ke parde paD. gaye
ab koii husn-e-mujassim be_naqaab aayaa to kyaa

[mujassim=embodied, corporeal]

Khud chale aate to shaayad baat ban jaatii koii
baad tark-e-aashiqii Khat kaa jawaab aayaa to kyaa

muddato.n bichhaD.e rahe phir bhii gale to mil liye
ham ko sharm aayii to kyaa un ko hijaab aayaa to kyaa

ek tajallii se munawwar kiijiye qatl-e-hayaat
har tajallii par dil-e-Khaanaa_Kharaab aayaa to kyaa

[tajallii=raushni]

matalaa-e-hastii kii saazish dekhate ham bhii 'shakiil'
ham ko jab nii.nd aa gayii phir maahataab aayaa to kyaa

[matalaa=place of rising of muun, sun, or stars; maahataab=moon]