kuchh ajab zindagii ke manzar hai.n
duur tak ret ke samandar hai.n

merii hii roshanii ke paikar hai.n
chand shakle.n jo dil ke andar hai.n

dil jo Thahare to kuchh suraaG mile
qarz kis kis nazar ke ham par hai.n

hai ba.Dii chiiz naazukii dil kii
kis se kahiye ki log patthar hai.n

khul ga_ii aa.Nkh to khulaa ham par
Khvaab bedaariyo.n se bahatar hai.n

Khaamushii Khud hai ek gaharaa_ii
chup hai.n jo log ve samandar hai.n

zaKhm par kyaa guzar ga_ii 'Shayar'
rezaa rezaa tamaam nashtar hai.n